LENTEBURGUM vulgo LENTZBURG

LENTEBURGUM, vulgo LENTZBURG

opp. Helvetiae, cum arce, in Argovia, intra Hallvillam, prope Arolam, 1. mill. ab Arovio, et 1. a Brugis Helvet. caput Comit. cognominis. Olim enim Comites habuit illustris et perantiquae stirpis, qui ex Lentiensibus Lintzgower, Sueviae Algoviaeque incolis orti, Valentiniani Martianique Imperio, Alemannorum in Helvetiam irruptione factâ, hîc sedes sumpsêre. Postea, per coniugia, ad Habspurgios pervenit, et aliquandiu Austriacorum Principum imperium agnovit. Sed proscripto Frid. Austrio A. C. 1415. opp. cum arce, iussu sigismundi Imp. a Bernatibus occupatum, hisque postea ab Imperio pignori datum, iis etiamnum subest; sedes praefecti arx est: interim peculiarem opp. Senatum, sub capite Sculteto habet. Vide Stumpf. l. 7. de Argovia.